‎မညီမျှသောချစ်ခြင်းမှညီမျှခြင်းသို့‬

ယောက်ျားတစ်ယောက်၏ တန်ဖိုးသည် သူ၏ သစ္စာတရားပင်ဖြစ်သည်။ မိန်းမတစ်ယောက်၏ တန်ဖိုးသည် သူ၏ စောင့်ထိန်းမှုပင်ဖြစ်သည်။ အိမ်ထောင်တစ်ခု၏ တန်ဖိုးသည်ကား ထိုအိမ်ထောင်ကို တည်ဆောက်သူတို့၏ မျှော်မှန်းချက်ပင်ဖြစ်ပေလိမ့်မည်။ အိမ်ထောင်ဦးစီးနှင့် အိမ်ရှင်မတို့က မိမိတို့အိမ်ထောင်ရေးအား မည်သို့ ပုံဖော်ခြယ်မှုန်းမည်ကို ဆိုလိုခြင်းပင်ဖြစ်သည်။ တန်ဖိုးရှိသော ယောက်ျားနှင့် မိန်းမတို့သည် မိမိ အိမ်ထောင်ဖက်အား နားလည်မှုဖြင့် ထိန်းကျောင်းလမ်းပြပေးမည်ဖြစ်သည်။ တစ်ဦးနှင့် တစ်ဦး အရာရာကို ရင်ဆိုင် အဖြေရှာ ဖြေရှင်းသွားကြမည်မှာ မလွဲဧကန်ဖြစ်ပေမည်။


ခေတ်၏ ပြောင်းလဲခြင်းရာညွှန်းကိန်းတို့မြင့်တက်လာသည်။ သိသာမြင်သာရှိသည့် ဥပမာများမှ အိမ်ထောင်ရေးမတည်မြဲမှု ရာခိုင်နှုန်းများ မြင့်တက်လာမှုမှာ သတိပြုစရာပင်ဖြစ်သည်။ အိမ်ထောင်ရေးမတည်မြဲခြင်းဆိုရာဝယ် မည်သူ့တွင် တာဝန်ရှိသနည်းဆိုတဲ့ မေးခွန်းထုန်ရပြန်မည်။ အိမ်ထောင်ရေးသာယာ ချမ်းမြေ့မှုသည် အိမ်ထောင်ရှင်တို့၏ ထိန်းသိမ်းစောင့်ရှောက်မှုပင်ဖြစ်သည်။ ချစ်၍သော်လည်းကောင်း၊ သင့်တော်၍သော်လည်းကောင်း၊ အားကိုး၍သော်လည်းကောင်း၊ ယုံကြည်၍သော်လည်းကောင်း အကြောင်းအမျိုးမျိုးကြောင့် လက်ထပ်ထိမ်းမြားကြသည်။ မထိမ်းမြားခင်က ယုံကြည်ခဲ့သော ထိုယုံကြည်မှုတို့သည် လက်တွေ့တွင် စိတ်ကူးယဉ်ထားသလောက် မချောမွေ့တတ်ပါ။ တချို့သော အရာတို့က မိမိ၏ လုပ်ဆောင်မှုဖြင့် မိမိယုံကြည်ရာကို ဆောက်တည်ကြရသကဲ့သို့ မိမိ၏ အပြုအမူကြောင့်ပင် ထိုတည်ဆောက်အံ့ (သို့) တည်ဆောက်ပြီးသော အရာတို့လည်း ပျက်စီးကြရပြန်သည်။ ထိန်းသိမ်းခြင်းမပါသော တည်ဆောက်ခြင်းသည် ခိုင်မြဲခြင်း အဓိပ္ပာယ်မဖော်ဆောင်ရာ။ ထိုအချက်အား သတိပြုမိစေချင်သည်။
အိမ်ထောင်တစ်ခုအား တည်ထောင်ရာတွင် အချစ်၊ မေတ္တာ၊ သစ္စာ၊ နားလည်မှု၊ အနစ်နာခံမှု၊ ပဲ့ပြင်ထိန်းသိမ်းမှု၊ တာဝန်ယူမှု နှင့် မိမိ၏ အိမ်ထောင်အား တန်ဖိုးထားမှု စသော အခြေခံကျသည့် လူ့ကျင့်ဝတ်တို့ကို နားလည် လက်ခံ ကျင့်သုံးရန်လိုအပ်ပါသည်။ မိမိ၏ မိဘအိမ်တွင် လွတ်လပ်ပေါ့ပါးစွာ အရာတော်တော်များများအား မေ့လျော့ နေခဲ့မိပေလိမ့်မည့်။ ဘ၀၏ တိုက်ပွဲအား နှစ်ကိုယ်တူ ဒိုးတူဘောင်ဘက် တိုက်ပွဲဝင်ရာတွင် မရင့်ကျက် နားမလည်ခဲ့သော အရာတို့သည် အခက်အခဲများဖြစ်လာသည်။ အရာရာသည် မိမိတို့နှင့် သက်ဆိုင်လာသည်။ ယခင်က ရေ၏တန်ဖိုး၊ မီတာခ၊ အဆင်သင့် ထမင်းဟင်း စားသောက်ဖွယ်ရာ၊ နေစရာ၊ လူမှုရေး၊ သာရေး၊ နာရေး၊ ကျန်းမာရေး စသည်တို့ မည်သို့လည်ပတ်သည်ကို အလေးမထားခဲ့သော်လည်း ယခု မိမိစဉ်းစားတွက်ချက်ရမည့် အခြေခံ အိမ်အသုံးစရိတ်ဖြစ်လာသည်။ ဘ၀၏ နိယာမ၊ အခက်အခဲတို့ စတင်ချိန်ဖြစ်သည်။ ပင်လယ်ပြင်အား ကျော်ဖြတ်လိုလျင် လှိုင်းကြောက်၍ မဖြစ်ပေ။ အခက်အခဲအတားအဆီးတို့အား ရင်ဆိုင်ရချိန်တွင် အချို့ က တစ်ဦးကို တစ်ဦး အပြစ်တင်ကြပြီး အချို့ က တစ်ဦးကို တစ်ဦး ဖေးမကြသည်။ ဤသည်မှ စ၍ အိမ်ထောင်ရေး၏ ရသ ပြောင်းလဲလာတော့သည်။
ပြဿနာတစ်ခုကို ဖြေရှင်းမည့်နည်းလမ်းအား မရှာဖွေပဲ တစ်ဦးပေါ် တစ်ဦး အပြစ်တင် ပြောဆိုခြင်း၊ ဖေးမကူညီထိန်းသိမ်းမှုမရှိခြင်း၊ လွန်ကဲစွာ အလိုလိုက်အကြိုက်ဆောင်ခြင်း၊ လျစ်လျူရှုခြင်းတို့သည် စိတ်ဝမ်းကွဲခြင်း၏ အစဖြစ်သည်။ အချစ်တို့မှေးမှိန်လာသည်။ နားလည်မှုတို့ပျောက်ဆုံးကုန်၏။ တစ်ဦးနှင့်တစ်ဦး တန်ဘိုးမထားနိုင်တော့။ အနစ်နာခံမှုတို့ အနတ္ထိဖြစ်လာသည်။ လူကြီးသူမတို့၏ အဆုံးအမများအား မေ့လျော့ကုန်သည်။ ဤသို့ဖြင့် အိမ်ထောင်ဦးစီးနှင့် အိမ်ထောင်ရှင်တို့သည် စိတ်၏ ညစ်ညူး နှိပ်စက်မှုဒဏ်ကို မခံနိုင်ပဲ ပျော်မွေ့ယာ အဖြေရှာရာမှ တဆင့် သူတို့၏တန်ဖိုးတို့ ဆုံးရှုံးကုန်၏။ မိမိတို့၏ ၀တ္တရားတို့ မကျေပွန်နိုင်တော့ပဲ အိမ်ထောင်အား ထိန်းသိမ်းနိုင်စွမ်းတို့ ကျဆင်းကုန်၏။ ပတ်ဝန်းကျင်အားလည်း အလေးမထား ဂရုမစိုက်နိုင်တော့။ အိမ်ထောင်မတည်မြဲခြင်း၏ နိဒါန်းအစပြုခဲ့လေသည်။ ခေတ်၏တိုက်စားမှုသည် အရှိန်အဟုန်ပြင်းစွာဖြင့် လူမှုရေး၊ နေထိုင်ရေး၊ စားသောက်ရေးပုံစံတို့အား ပြောင်းလဲပေးလျက်ရှိနေသည်။ ပြောင်းလဲတိုးတက်လာသော ခေတ်ရေစီးကြောင်းပေါ်တွင် မရင့်ကျက် မတိုးတက်သူတို့ အနေအထိုင်ပျက်ပြား၍ ဟီရိသြတ္တပတရားတို့ အရောင်မှိန်ကုန်ကြသည်၊ မှန်ကန်သောလမ်းပြမှုမရှိသည့်အတွက် အတွေးအခေါ်တို့ ၀ါးမြိုခံကြရသည်။ ဤသို့ဖြင့် မဖြောင့်တန်းသော အနာဂါတ်လမ်းမများအား ရင်ဆိုင်ကြရလေသည်။
အိမ်ထောင်ဦးစီး၏ သစ္စာတရားသည် အိမ်ထောင်ရှင်မ၏ ယုံကြည်ကိုးစားဖွယ်ရာဖြစ်သကဲ့သို့ သူ၏ ဂုဏ်ဒြပ်လည်းဖြစ်သည်။ အိမ်ထောင်ရှင်မတစ်ယောက်၏ အိမ်ထောင်ထိန်းသိမ်းမှု၊ ၀တ္တရားကျေပွန်မှု၊ ခင်ပွန်းသည်အား ကူညီလမ်းပြ ထိန်းကွတ်ပေးနိုင်မှုတို့သည် သူမ၏ လေးစားအတုယူဖွယ် ဂုဏ်ဒြပ်များပင်ဖြစ်ပါသည်။ တစ်ဦး၏ ပြသနာများ၊ အားနည်းချက်၊ လိုအပ်ချက်များအား တစ်ဦးက ဖေးမကူညီလမ်းပြခြင်း၊ အသိပညာ ဥာဏ်အမျှော်အမြင်ရှိစွာ ဖြေရှင်းပေးခြင်း တို့သည် အချင်းချင်း ကူညီစောင့်ရှောက် တန်ဖိုးထားခြင်းမည်ပေမည်။ ပြဿနာအား အတူရင်ဆိုင်ဖြေရှင်း ကျော်လွှားခြင်းဖြင့် အတူတူ ကြံ့ခိုင်မှုရှိသော အနာဂါတ်တစ်ခုကို လှမ်းလျောက်နိုင်ပေမည်။ ယုံကြည်မှုဖြင့် နားလည်မှုတည်ဆောက်နိုင်သကဲ့သို့ နားလည်မှုရှိခြင်းသည်လည်း ယုံကြည်ခြင်းကို ဖော်ဆောင်ရာဖြစ်ပေမည်။ ဤသို့အားဖြင့် မညီမျှသော ချစ်ခြင်းတို့ ညီမျှခြင်းထိုးလာနိုင်ကြပါလိမ့်မည်။
Yangon Life